10個方法回應關於「團隊合作」嘅面試問題！ 10 Surefire Ways to Answer Team Interview Questions

點解所有應徵者，包括資深僱員都要準備好回答關於「團隊合作」嘅問題呢？

你有冇聽過「想行得快，一個人行；想行得遠，一班人行。」？

人類根本就係群居、需要社交嘅生物。無論你係乜嘢工作崗位，冇人真正係獨立工作嘅。僱主注重團隊合作嘅原因好明顯。僱主都深深明白到佢盤生意行得有幾遠係完全在於佢建立嘅團隊有幾強大。任何人去見工，無論係乜嘢職位乜嘢職級，都一定要識得同其他人合作。所以，無論你係見乜嘢工、乜嘢範疇，都一定關團隊合作事，你都一定要準備好回答關於呢個題目嘅問題。

有一點值得一提：喺每一個工作環境，團隊合作嘅模式都非常唔一樣。所以，你唔可以期望去到邊都係答返同一set問題。僱主通常都會想知道你可唔可以同唔同嘅人合作得到，同埋想了解你嘅工作模式同經驗會唔會對佢哋團隊有幫助。呢個時候，千祈唔好形容自己為「獨行俠」，因為咁樣暗示咗你難同人相處同合作。

「團隊合作」面試問題小貼士

1）首先，確保自己真係了解「團隊合作」係咩一回事。通常，你會同一班人一齊完成一件工作或者一個project。你會負責其中某部份去令呢件事順利完成。最後嘅完成品或者結果比起你自己能唔能夠突出自己嘅表現重要好多。總之，團隊合作就係講求一班人去做一件事，個人主義喺呢度完全幫唔到手。

2）保持正面，強調你做到團隊合作嘅正面例子，例如你點樣同其他人工作得愉快或者同其他人相處得和諧。有啲應徵者甚至會舉啲實例，例如之前同其他人合作嘅經驗之中，有啲咩時候係唔成功嘅，可以講出佢哋喺當中學到嘅道理，同埋下一次點樣做得好啲。

3）專注聽面試官講嘢亦都係重要嘅策略。一個團隊之中，唔可以每人每一刻都喺度表達意見。同人合作其中一個關鍵就係聆聽其他人嘅意見。所以面試官同你講嘢嘅時候，保持微笑、點頭、眼神交流，令到對方知道你聽緊佢講嘢。

4）提及一啲你作為一個好嘅隊員嘅特質，例如善於溝通、善於解難、可靠、有責任感、識得尊重其他人、善於聆聽、情緒智商高等等。

5）了解一下團隊合作嘅好處同壞處。一啲團隊合作嘅好處包括：可以令團隊有更多創新嘅想法、會做出更加完備嘅決定、可能會犯少啲錯、團隊嘅成員可以互相幫助、成員之間可以互相分擔壓力等等。但係團隊合作都有佢嘅弊處：可能會用上更加多時間來處理某啲事情、要花好多時間去達到共識、要花心思同精力維繫隊員之間嘅關係等等。

6）花啲時間研究一下你申請緊嘅工作嘅職位描述，組織一下你過往嘅團隊合作經驗點樣可以幫助你喺新嘅工作同其他人合作得順暢啲或者提高整個團隊嘅表現。

7）如果你係職場新鮮人，唔使擔心。你點都係讀書嘅過程之中有做過group project或者一啲團隊合作嘅訓練。花啲心機回憶一下、了解一下自己係一個團隊入面通常擔當乜嘢角色：領袖？跟隨者？主持人？你通常係提供新嘅諗法、幫手執行，定係提供到專業知識？你可以搵一啲可靠嘅朋友聽吓你組織出嚟嘅答案，睇吓佢哋認為你講嘅嘢同你自己嘅實際情況吻唔吻合。

8）通常同團隊合作有關嘅題目都係問及你以前嘅處境，例如「講吓你一次……嘅經驗」或者「你有冇試過……」。當你聽到呢啲字詞，你就應該意識到對方可能係問緊有關團隊合作嘅問題。你就可以準備用你整理咗嘅嘢回答。

9）網上有好多關於團體合作嘅資料，有啲更加詳細嘅面試題目整理。花啲時間睇吓佢，更好咁準備你嘅面試！

10）唔好唔記得加以練習！有關團隊合作嘅問題只會佔面試好少部份，記住其他題目都一定要練習再練習啊！