呢個時勢，啱啱出嚟打工嘅我哋都唔望買到樓㗎喇，但如果因為冇買樓嘅目標而完全放棄管理你嘅金錢，少年你就太天真了！我哋嗰萬幾蚊兩萬人工，你估過多幾年真係會倍升？都可能會嘅，但係我就建議主動啲自己去做開源節流，主動將自己有嘅錢滾大，定立自己嘅儲錢策略，對抗通脹！
節流
1）個人財務記錄
如果你冇記錄低自己洗過嘅錢嘅習慣，就要開始喇！有好多手機應用程式可以幫到手，你只要每次輸入返你用咗幾多錢用來做乜，每個月就會有一個仔細嘅財務報告。有啲應用程式甚至可以俾你連接八達通、信用卡等電子貨幣戶口，咁你用電子貨幣俾錢就會自動有記錄。呢個財務報告對你認識自己嘅消費模式非常有用！
2）分析自己嘅消費行為
如果你係「月光族」，咁第一步你就一定要開始做喇，有咗自己嘅財務記錄，就可以分析下點解自己每個月都冇錢剩。要對抗通脹幾乎都一定要學識投資，而投資需要本金，你要首先儲到一筆細細地嘅本金先至可以等佢慢慢增長。每個人收入都唔同，可以儲嘅錢同洗嘅錢比例都各有不同。例如如果你收入比較少，你可能要洗八成嘅錢而淨係儲到兩成。有咗自己嘅財務記錄之後分析下自己嘅消費係咪全部都係有必要嘅，如果醒覺自己用咗啲錢嚟買啲唔等洗嘅嘢，可能要開始限制自己每個月用嚟買無聊嘢嘅金額。唔係叫你完全唔好有多餘消費，大家都知道shopping係好減壓嘅，只係有個限制，唔好搞到自己買嘢買到儲唔到錢。
開源
3）銀行定期存款
銀行定期存款係最保守嘅投資之一，其實即係借錢比銀行去投資。呢種做法，銀行係會承擔所有風險，所以對你來講其實係一定唔會蝕嘅。簡單啲來講，定期存款即係話你有一舊錢，決定好未來嗰三個月都唔需要用到㗎啦，就擺入去做定期存款，三個月之後銀行就會俾返嗰舊錢（本金）同埋所得嘅利息俾你。年利息由0.1%到6%不等。例如你攞一萬蚊去做年利息0.15%嘅12個月定期存款， 12個月後你就會收到$10,015。有啲銀行同虛擬銀行嘅最低存款額甚至係由港幣$10起，呢種投資方法雖然賺到嘅利潤唔多，但你唔需要鑽研太多，只係放一啲你本身都未必會動用嘅資金落去另一個戶口，然後就可以被動地增加收入。
4）零存整付
零存整付又係另一個本金唔需要好多，風險又低嘅開源策略。唔少銀行都有推出「零存整付」計劃，即係客戶每個月供一舊錢落去，例如每個月月頭存入$1000，月尾就會有利息，第二個月月頭再存入$1000 ，第二個月嘅利息就會按住$2000加第一個月嘅利息作本金咁計算。即係話你每個月所得嘅利息會持續增加。呢個係你擺脫月光族之後可以做嘅事，因為要自律地每個月抽起一筆錢去做存款。
5）股票及基金投資
就算你唔去研究股票同基金點運作，你其實都要應付佢哋，因為喺你嘅強積金入面，你已經要選擇你嘅股票同基金組合。而股票及基金投資涉及嘅風險比起以上兩種投資多好多，建議大家做好資料蒐集，有足夠嘅多餘資金先至好去考慮。而家市面上除咗可以喺銀行開投資戶口買賣股票之外，亦可以透過唔同嘅網站同應用程式買賣股票，有啲程式更加可以讓你無需支付手續費就可以自由買賣港股同美股。總之，所有嘢切記謹慎。而且唔好因為一時興奮瞓身大手入股某一隻股票，分散投資先可以確保你承受嘅風險減到最低。
其實講到尾，買樓可能而家聽起嚟遙不可及，認真諗吓，其實都未必嘅。由自己年輕力壯開始慢慢儲錢，就算到時買唔到樓，都起碼有足夠嘅錢租間好啲嘅屋住下吖！
Recommendations for You
Career Path
