Work from home? 把握時間進修！ 5個免費及收費網上課程平台 5 Online Course platforms to consider whilst working from home

疫情之下，work from home又冇得去街好得閒？把握時機，持續進修自我增值啦！以下幾個網上課程平台，包括世界各地唔同大專院校嘅網上課程，頗具認受性。一齊睇吓有咩讀啦！

1）香港中文大學專業進修學院

呢度嘅課程包羅萬有，包括設計、修圖、投資、語文、求職技巧、心理學等等。雖然全部都係收費課程，但課程編排認真，大部份課程都有導修課，輔助學生理解。而且價錢都係千幾蚊起，無論係為咗升職加人工定係培養新興趣，CUSC嘅課程絕對有質素保證！

2）Massive Open Online Courses (MOOC)

呢個網站集合左世界各地唔同知名嘅大學大專院校嘅網上課程，課程種類包羅萬有，包括飛機工程、語文課程、營養學、時裝、藝術、人文學等等，大部份課程都係免費嘅，上完課程之後，你仲可以選擇俾少少錢攞返張證書添！

3）Google Digital Garage

而家所有嘅行業都同互聯網分唔開。學識網上營銷、網上市場拓展等等嘅知識對日後嘅工作一定有幫助。而且Google提供嘅課程絕對係運用返Google平台嘅最仔細嘅課程。Google將所有知識分到幾分鐘幾分鐘一課，課後設小測，保證你吸收到課堂內容。易入口又免費，試吓無妨！

4）Crashcourse

Crashcourse係其中一個最大型嘅YouTube教學平台。當中有唔同類型嘅影片課程，包括關於企業管理、經濟學、知識產權、數據分析等等直接可以喺職場應用到嘅知識，亦都有擴闊你對世界嘅視野嘅知識系列，例如關於動物食嘢嘅知識、氣候變化、歐洲歷史、生物學、神秘學等等。唯一唔好處係所有影片都係英文嘅。

5）Amazing Talker

學一種新語言係要不斷講不斷練習嘅。呢個近年興起嘅網上語言學習平台，連接學生同世界各地嘅老師，好似補習咁自己約時間，自訂收費。所以如果你勤力嘅話，你可以上密啲堂，就可以進步得快啲啦！亦都唔使怕去公眾場所例如coffee shop、快餐店嗰度學習怕尷尬。你亦都可以同時跟幾個老師一齊學習，搵出最適合你嘅教授方法。（第時去旅行就唔使下下Google Translate咁樣衰喇！）

疫情之下，所有嘢都好似進入左一片混沌，成個世界好似慢咗落嚟，但係我哋不斷進步嘅步伐一定唔可以一齊慢落嚟！有空閒時間，讀吓呢啲網上課程，輕鬆喺屋企重拾對生活嘅熱誠同興趣啦！