呢份工可能本身係你嘅夢想工作，但做落發覺原來係個惡夢咁點算呢？你會捱過佢定係早走早着呢？
你有冇試過收到取錄通知之後開心到飛咗上天，一直期待期待期待到返工返咗幾日先發現份工同你預期嘅差好遠，伏味濃，心情跌到落谷底？呢個情況其實比你想像中常見。
......研究顯示
一個由Glassdoor做緊研究顯示10個有6個打工仔發現佢哋嘅新工同面試中定立嘅預期有顯著差別。有人力資源專家將見工面試同第一次約會類比，雙方都係喺自己嘅最佳狀態，雙方都想向對方推銷自己。呢個情況代表冇任何一方會老實咁承認自己嘅弱點。所以，份工嘅真實狀況同應徵者嘅真實能力可以係同面試表現出來嘅好唔同。通常，會令新員工驚訝嘅係新職位嘅職責、工作氣氛同工時長短。
但係，我哋都知道辭職一啲都唔易講出口。大部份人會擔心破壞人際關係或者惹來流言蜚語。加上有好多實際嘅嘢我哋要考慮，例如係金錢上，我哋有冇能力支撐自己渡過搵一份新工嘅時間呢？就算我搵倒一份新工，又會唔會一定比而家呢份好呢？所有嘢加埋令到辭職成為一件好令人頭痛嘅事。
美國勞工統計局嘅研究顯示平均工作任期係4.2年，而平均工作任期喺唔同嘅年齡層會有幾大落差，例如25至34歲嘅勞工嘅平均工作任期只有3.2年。理想嘅情況之下，僱員要留喺同一份工作超過兩年先會從工作中得到好處，但係喺現實中有好多因素令到一個人要辭職，例如工作環境對你嘅身體或者心靈健康有好大嘅傷害，令你無可奈何需要辭職，或者你突然間被公司裁員，而——呢個情況近年疫情底下非常常見。所以，我哋可以嚟到呢一篇文章嘅重點 我哋點樣減低辭職
帶嚟嘅負面影響呢？
如何減低辭職帶嚟嘅傷害：
1）唔好衝動！俾多一次機會份新工同埋間公司。通常返新工都會遇到好多新嘅困難同挑戰，容易令人緊張或者擔心。你可以嘗試用三至六個月習慣一下新工嘅職責，摸索一下自己係公司嘅位置。遇到難題，你可以冷靜咁同上司討論解決方法，同時顯示你嘅專業。表達你嘅感受，尋求上司嘅意見，睇吓自己可以做啲乜嘢改善現時嘅情況。以上嘅做法都會令你嘅上司有定心理準備，可以減低對你將來辭職帶嚟嘅不滿。
2）當你決定咗辭職係對大家最好嘅做法，最好搵定一份新工先至辭職，因為你在職嘅時候係比較容易有人請嘅。但係要小心，唔好重蹈覆轍，細心考慮一下新嘅公司同職位適唔適合你，千祈唔好為咗逃避本身嗰份工而求其答應返另一份工。
3）計算好辭職嘅最佳時機。好多喺生活上有唔同嘅財政承諾，例如供緊樓、還緊學債、生活費用等等，長時間零收入會帶來好大嘅壓力。搵一份新工通常需要三至六個月時間，而辭職又需要早一個禮拜至兩個月通知公司，好多時，你需要面對新工早過last day開始嘅兩難局面。喺通知期結束之前離職通常都要罰款或者償還唔同嘅福利等等，所以一定要考慮清楚啊！
4）要小心避免突然辭職可以對自己帶嚟嘅傷害，你喺行內聲譽一旦受損，就可能返唔到轉頭。例如，你會希望避免被同一間公司或者公司入面嘅人列入錄用黑名單。辭職嘅時候緊記要專業，親身向上司交一封正式、列印出嚟嘅辭職信。你唔一定要提供辭職嘅理由，但係你應該盡量令老闆知道你並唔會對公司懷恨在心，做出對公司不利嘅事。你可以問上司佢希望點樣宣布你辭職嘅事，同埋點樣處理交接嘅事宜。
5）保持一個正面、有禮嘅態度，唔好喺辭職申請被接納之後就hea做。你嘅專業就係你嘅口碑！記住保持專業嘅態度，盡力做好呢份工直至最後一日。
6）履歷上有一份做得唔長嘅長工未必會令僱主起疑，但係如果你有連續幾份工都係咁，僱主就會擔心喇。你最好喺面試時向對方提供體面嘅理由，甚至講吓你喺呢份工度學到啲乜嘢，同埋得到點樣嘅寶貴經驗，令到呢一個短暫嘅工作經驗變得正面。例如你可以講你更加清楚自己喺一份工作入面希望得到啲乜嘢、有啲乜嘢期望，新嘅職位點樣適合你。
7）唔好因為一個不愉快嘅工作經驗就對自己失去信心。每個人都會犯錯。辭職並唔係世界末日。提醒自己，你曾經成功獲得左而家呢份工嘅取錄。肯定自己係有係呢一行發展嘅資歷同埋條件。結束感情沒有罪，變心不是你不是你不對。一個人同份工唔夾，唔係任何一方嘅錯。記住好來好去，如果決定辭職，就好好展望將來。祝大家早日搵到自己做得開心嘅工！
